Канон молебный при разлучении души от тела

Канон молебный при разлучении души от тела

Канон молебный ко Господу нашему Иисусу Христу и Пречистей Богородице Матери Господни при разлучении души от тела всякаго правовернаго

Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Припев: Пресвятая Богородице, спаси нас.
Каплям подобно дождевным, злии и малии дние мои, летним обхождением оскудевающе, помалу исчезают уже, Владычице, спаси мя.
Твоим благоутробием и многими щедротами Твоими, Владычице, преклоняема естественно, в час сей ужасный предстани ми, Помощнице Непоборимая.
Содержит ныне душу мою страх велик, трепет неисповедим и болезнен есть внегда изыти ей от телесе, Пречистая, юже утеши.
Слава Отцу и Сыну и Святому Духу. Грешным и смиренным известное прибежище о мне извести Твою милость, Чистая, и бесовския избави руки, якоже бо пси мнози обступиша мя.
И ныне и присно и вовеки веков. Аминь. Се время помощи, се время Твоего заступления, се, Владычице, время, о немже день и нощь припадах тепле и моляхся Тебе.

Песнь 3

Несть свет, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Издалеча сего дне, Владычице, провидя, и того яко пришедша помышляяй присно, слезами теплыми моляхся не забыти мене.
Обыдоша мя мысленнии рыкающе скимны, и ищут восхитити и растерзати мя горце, ихже зубы, Чистая, и челюсти сокруши и спаси мя.
Угасшу убо отнюд органу словесному, и связавшуся языку, и затворившуся гласу, в сокрушении сердца молю Тя, Спасительнице моя, спаси мя.
Слава Отцу и Сыну и Святому Духу. Приклони ухо Твое ко мне, Христа Бога моего Мати, от высоты многия Твоея, Благая, и услыши стенание конечное, и руку ми подаждь.
И ныне и присно и вовеки веков. Аминь. Не отврати от мене многия щедроты Твоя, не затвори утробу Твою человеколюбную, Чистая; но предстани ми ныне и в час судный помяни мя.

Песнь 4

Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.
Умовение согрешением, ток слезный ныне положи, Благая, сердца моего сокрушение приемлющи: о Тебе утверждающу упование, Благая, егда како страшнаго мя избавиши огненнаго мучения, яко Сама благодати еси источник, Богородительнице.
Непостыдное и Непогрешительное всем, иже в нуждах, прибежище, Владычице пренепорочная, Ты ми буди Заступница в час испытания.
Простерши Пречистеи Твои и Всечестнеи руце, яко священнии голубине криле, под кровом и сению тех покрый мя, Владычице.
Слава Отцу и Сыну и Святому Духу. Воздушнаго князя насильника, мучителя, страшных путей стоятеля и напраснаго сих словоиспытателя, сподоби мя прейти невозбранно отходяща от земли.
И ныне и присно и вовеки веков. Аминь. Се мя, Владычице, страх усрете, егоже и бояхся; се подвиг велик объят мя, в немже буди ми Помощница, Надежде спасения моего.

Песнь 5

Божиим светом Твоим, Блаже, утренюющих Ти души любовию озари, молюся, Тя ведети, Слове Божий, Истиннаго Бога, от мрака греховнаго взывающа.
Не забуди мя, Благая, ниже отврати от мене, Твоего отрока, лице Твое, но услыши мя, яко скорблю, и вонми души моей, и сию избави.
Иже по плоти, сродницы мои, и иже по духу братие, и друзи, и обычнии знаемии, плачите, воздохните, сетуйте, се бо от вас ныне разлучаюся.
Ныне избавляяй никако и помогаяй воистинну никтоже. Ты помози ми, Владычице, да не яко человек безпомощен, в руках враг моих затворен буду.
Слава Отцу и Сыну и Святому Духу. Вшедше, святии мои Ангели, предстаните судищу Христову, колене свои мыслении преклоньше, плачевне возопийте Ему: помилуй, Творче всех, дело рук твоих, Блаже, и не отрини его.
И ныне и присно и вовеки веков. Аминь. Поклоньшеся Владычице и Пречистеи Матери Бога моего помолитеся, яко да преклонит колена с вами, и преклонит Его на милость: милости бо сущи и питательница услышана будет.

Песнь 6

Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Устне мои молчат, и язык не глаголет, но сердце вещает: огнь бо сокрушения сие снедая внутрь возгарается, и гласы неизглаголанными Тебе, Дево призывает.
Призри на мя свыше, милости Божия, и милостивно вонми ныне на мое посещение снити, яко да видев Тя, от телесе изыду радуяся.
Растерзаеми соузы, раздираеми закони естественнаго сгущения, и составления всего телеснаго, нужду нестерпимую и тесноту сотворяют ми.
Слава Отцу и Сыну и Святому Духу. Святых Ангел священным и честным рукам преложи мя, Владычице, яко да тех крилы покрывся, не вижу безчестнаго и смраднаго и мрачнаго бесов образа.
И ныне и присно и вовеки веков. Аминь. Чертоже Божий Всечестне, Небесному разумному чертогу сподоби мя мою угасшую и несияющую свещу вжегши, святым елеем милости Твоея.

Кондак, глас 6

Душе моя, душе моя, востани, что спиши, конец приближается, и нужда ти молвити: воспряни убо, да пощадит тя Христос Бог, Иже везде сый, и вся исполняяй.
Икос: Христово врачевство видя отверсто, и от сего Адаму источающе здравие, пострадав уязвися диавол, яко беды приемля рыдаше, и своим другом возопи: что сотворю Сыну Мариину? Убивает мя Вифлеемлянин, Иже везде сый и вся исполняяй.

Песнь 7

Росодательну убо пещь содела Ангел, преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Нощь смертная мя постиже неготова, мрачна же и безлунна, препущающи неприготовлена к долгому оному пути страшному: да спутешествует ми Твоя милость, Владычице.

Се вси дние мои исчезоша воинстинну в суете, якоже пишется, и лета моя со тщанием, сети же смертныя воистинну и горькия предвариша мою душу, яже мя обдержат.

Множество грехов моих да не возможет победити Твоего многаго благоутробия, Владычице, но да обыдет мя Твоя милость и вся да покрыет беззакония моя.
Слава Отцу и Сыну и Святому Духу. Отводящий мя отсюду находят, содержаще мя всюду: душа же моя отлагает и страшится, многа исполнена мятежа, юже утеши, Чистая, явлением Твоим.

И ныне и присно и вовеки веков. Аминь. Спечалующаго ниединаго в скорби моей, ниже утешающаго обретох, Владычице, ибо друзи мои и знаемии вкупе оставиша мя ныне, но надежде моя, никакоже да не оставиши мя.

Песнь 8

Из пламене преподобным росу источил еси, и праведнаго жертву водою попалил еси, вся бо твориши, Христе, токмо еже хотети. Тя превозносим во вся веки.
Яко Бога Человеколюбца Мати Человеколюбивая, тихим и милостивым воими оком, егда от тела душа моя отлучается, да Тя во вся веки славлю, Святая Богородице.
Убегнути ми варвар безплотных полки, и воздушныя бездны возникнути, и к Небеси взыти мя сподоби, да Тя во веки славлю, Святая Богородице.

Рождшая Господа Вседержителя, горьких мытарств начальника миродержца отжени далече от мене, внегда скончатися хощу, да Тя во веки славлю, Святая Богородице.

Слава Отцу и Сыну и Святому Духу. Великой последней гласящей трубе, в страшное и грозное воскрешение суда, воскресающым всем, помяни мя тогда, Святая Богородице.

И ныне и присно и вовеки веков. Аминь. Высокая Владыки Христа палато, Твою благодать свыше пославши, предвари мя ныне в день озлобления, да Тя славлю во веки вся, Святая Богородице.

Песнь 9

Бога человеком невозможно видети, на Негоже не смеют чини Ангельстии взирати. Тобою же, Всечистая, явися человеком Слово Воплощенно. Егоже величающе, с Небесными вой, Тя ублажаем.

О, како узрю Невидимаго? Како ужасное оно претерплю видение? Како дерзну отверсти очи? Како моего Владыку смею видети, Егоже не престаях от юности огорчевая присно?

Святая Отроковице, Богородительнице, на мое смирение милосердно призри, умиленное мое и последнее моление сие приимши, и мучащаго вечнующаго огня потщися избавити мя.

Храмы святыя осквернившая, скверный и телесный храм оставивши, Тебе, Божий всечестный храме молит, Отроковице Дево Мати, душа моя тьмы кромешния убежати и лютаго геенскаго жжения.

Слава Отцу и Сыну и Святому Духу. Зря конец близу жития моего, и помышляя безместных мыслей, деяний же, Всечистая, душу мою делательницу, люте уязвляются стрелами совести, но преклоншися милостивно, буди ми Предстательница.

И ныне и присно и вовеки веков. Аминь. Сын дастся нам за милость, Сын Божий и Ангельский Царь, Превечный от чистых кровей Твоих Человек прошед. Егоже умилостиви, Отроковице, страстней моей душе, исторгаемей люте от окаяннаго моего телесе.

По окончании:

Достойно есть яко воистинну блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. Слава Отцу и Сыну и Святому Духу. И ныне и присно и вовеки веков. Аминь. Господи, помилуй (трижды)

Молитва, от иереа глаголемая на исход души:

Владыко Господи Вседержителю, Отче Господа нашего Иисуса Христа, Иже всем человеком хотяй спастися и в разум истины прийти, не хотяй смерти грешному, но обращения и живота; молимся, и мили ся Ти деем, душу раба Твоего (имярек) от всякия узы разреши и от всякия клятвы свободи, остави прегрешения ему, яже от юности, ведомая и неведомая, в деле и слове, и чисто исповеданная, или забвением, или студом утаеная. Ты бо Един еси разрешаяй связанныя и исправляли сокрушенныя, надежда неначаемым, могий оставляти грехи всякому человеку, на Тя упование имущему. Ей, Человеколюбивый Господи, повели, да отпустится от уз плотских и греховных, и приими в мир душу раба Твоего сего (имярек), и покой ю в вечных обителях со святыми Твоими, благодатию Единороднаго Сына Твоего, Господа Бога и Спаса нашего Иисуса Христа, с Нимже благословен еси, с Пресвятым и Благим, Животворящим Твоим Духом, ныне и присно, и во веки веков. Аминь.

Последование по исходе души от тела

Изшедшей убо души от тела, абие иерей начинает: Благословен Бог наш, всегда, ныне и присно и во веки веков.

Святый Боже, Святый Крепкий, Святый Безсмертный, помилуй нас. (трижды)
Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже, и мы оставляем должником нашим; и не введи нас во искушение, но избави нас от лукаваго. Молитвами святых отец наших, Господи Иисусе Христе Боже наш, помилуй нас. Аминь.

Посем с предстоящими поет или чтет тропари сия:

Со духи праведных скончавшихся душу раба Твоего, Спасе, упокой, сохраняя ю во блаженной жизни, яже у Тебе, Человеколюбче.
В покоищи Твоем, Господи: идеже вси святии Твои упокоеваются, упокой и душу раба Твоего, яко Един еси Человеколюбец.
Слава Отцу и Сыну и Святому Духу. Ты еси Бог, сошедый во ад и узы окованных разрешивый, Сам и душу раба Твоего упокой.
И ныне и присно и во веки веков. Аминь. Едина Чистая и Непорочная Дево, Бога без семене рождшая, моли спастися души его.

По сих же иерей глаголет ектению сию:

Помилуй нас, Боже, по велицей милости Твоей, молим Ти ся, услыши и помилуй.
Господи, помилуй (трижды).
Еще молимся о упокоении души усопшаго раба Божия (имярек), и о еже проститися ему всякому прегрешению, вольному же и невольному.
Господи, помилуй (трижды).
Яко да Господь Бог учинит душу его, идеже праведнии упокоеваются.
Господи, помилуй (трижды).
Милости Божия, Царства Небеснаго и оставления грехов его у Христа Безсмертнаго Царя и Бога нашего просим.

Подай, Господи.

Иерей: Господу помолимся.
Клирицы: Господи, помилуй.
Иерей: Боже духов и всякия плоти, смерть поправый, и диавола упразднивый, и живот миру Твоему даровавый, Сам, Господи, покой душу усопшаго раба Твоего (имярек) в месте светле, в месте злачне, в месте покойне, отнюдуже отбеже болезнь, печаль и воздыхание, всякое согрешение, содеянное им словом, или делом, или помышлением, яко Благий Человеколюбец Бог, прости: яко несть человек, иже жив будет, и не согрешит. Ты бо Един кроме греха, правда Твоя, правда во веки, и слово Твое истина.
Яко Ты еси Воскресение и Живот, и Покой усопшаго раба Твоего (имярек), Христе Боже наш, и Тебе славу возсылаем, со Безначальным Твоим Отцем, и Пресвятым, и Благим, и Животворящим Твоим Духом, ныне и присно и во веки веков.
Клирицы: Аминь.

Скончав же сия, чтет псалом 90:

Хвала песни Давидовы, не надписан у еврей, 90

1 Живый в помощи Вышняго, в крове Бога Небеснаго водворится.
2 Речет Господеви: Заступник мой еси и Прибежище мое, Бог мой, и уповаю на Него.
3 Яко Той избавит тя от сети ловчи, и от словесе мятежна,
4 плещма Своима осенит тя, и под криле Его надеешися: оружием обыдет тя истина Его.
5 Не убоишися от страха нощнаго, от стрелы летящия во дни,
6 от вещи во тме преходящия, от сряща, и беса полуденнаго.
7 Падет от страны твоея тысяща, и тма одесную тебе, к тебе же не приближится,
8 обаче очима твоима смотриши, и воздаяние грешников узриши.
9 Яко Ты, Господи, упование мое, Вышняго положил еси прибежище твое.
10 Не приидет к тебе зло, и рана не приближится телеси твоему,
11 яко Ангелом Своим заповесть о тебе, сохранити тя во всех путех твоих.
12 На руках возмут тя, да не когда преткнеши о камень ногу твою,
13 на аспида и василиска наступиши, и попереши льва и змия.
14 Яко на Мя упова, и избавлю и: покрыю и, яко позна имя Мое.
15 Воззовет ко Мне, и услышу его: с ним есмь в скорби, изму его, и прославлю его,
16 долготою дней исполню его, и явлю ему спасение Мое.

И абие поет или глаголет канон сей за преставльшагося. Глас 8.

Песнь 1

Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Стих: Покой, Господи, душу усопшаго раба Твоего.
Отверз уста моя, Спасе, слово ми подаждь молитися, Милосерде, о ныне преставленном, да покоиши душу его, Владыко.
Мертв быв плотию, Спасе, и во гробе положен с мертвыми, душу раба Твоего покой в месте злачне, яко Милосерд.
Слава Отцу и Сыну и Святому Духу. Молебный глас мой услыши, Боже Триипостасне, и учини душу преставленнаго в недрах Авраамлих, Избавителю.
И ныне и присно и во веки веков. Аминь. Ты, Пречистая Богородице, Егоже без искуса мужеска заченши родила еси, моли Сына Твоего подати покой рабу Твоему преставленному.

Песнь 3

Небеснаго круга Верхотворче Господи и Церкви Зиждителю, Ты мене утверди в любви Твоей, желаний краю, верных утверждение, Едине Человеколюбче.
В месте злачне, в месте покойне, идеже лицы святых веселятся, душу раба Твоего представленнаго покой, Христе, Едине Милостиве.
Идеже лицы святых, тамо вчини, Владыко, послужившаго Тебе всем сердцем и воздвигшаго иго Твое на рамо свое, яко Един Владыка живота и смерти.
Слава Отцу и Сыну и Святому Духу. Небесный Отче Вседержителю, и Сыне Единородный, и Душе Святый Исходный, презри умершаго согрешения и в Церкви первенец всели его славити Тя со всеми угождшими Тебе.
И ныне и присно и во веки веков. Аминь. Яко Мати Святая Пресвятаго Бога, Владычице всяческих, Марие Богородице, со всеми святыми Сего моли душу покоити раба Твоего в Небесных селениих.

Песнь 4

Услышах, Господи, смотрения Твоего таинство, разумех дела Твоя и прославих Твое Божество.
Сошедый в преисподняя, Христе, совоздвигл еси умершыя вся, и преставльшагося от нас покой, Спасе, яко Щедр.
Никтоже без греха есть, токмо Ты Един, Владыко: сего ради преставленному и грехи остави, и в рай того всели.
Слава Отцу и Сыну и Святому Духу. Услыши, Троице Святая, гласы молебныя, приносимыя Тебе в церкви о усопшем, и Богоначальным Твоим светом озари душу, омраченную суетными привержении.
И ныне и присно и во веки веков. Аминь. Родила еси, Пречистая, без мужеска семене, Бога Совершенна и Человека Совершенна, вземлющаго грехи нашя, Дево. Того моли, Госпоже, преставльшемуся рабу Твоему подати покой.

Песнь 5

Просвети нас повелении Твоими, Господи и мышцею Твоею высокою Твой мир подаждь нам, Человеколюбче.
Имый живота и смерти власть, преставленнаго от нас покой, Христе Боже. Ты бо еси всех, Спасе, Покой и Живот.
На Тя, Спасе, надежду возложь, умерый отъиде от нас, Ты же, Господи, ущедри его, яко Бог Многомилостив.
Слава Отцу и Сыну и Святому Духу. Просвети нас, Трисвяте, воспеваемый Владыко, молящихся Тебе, мир Небесный прияти, и в мирных селях душу вчини, отшедшую от временных, в надежде безконечныя жизни.
И ныне и присно и во веки веков. Аминь. Шуяго стояния, Пречистая, избавити преставленнаго умоли Сына Твоего, Дево Госпоже, Яко Спаса и Бога нашего Мати Сущая.

Песнь 6

Молитву пролию ко Господу, и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
Ада испроверг, Владыко, воскресил еси умершыя от века и ныне преставленнаго от нас в недро Авраамле Ты, Боже, всели, прегрешения вся отпустив, яко Милосерд.
Заповедь, юже ми дал еси, Боже, преступих и смертен бых, но Ты, Боже, сошедый во гроб и душы яже от века воскресивый, не возстави мене, Владыко, на мучение, но на покой, преставленный вопиет Тебе нами, Многомилостиве.
Слава Отцу и Сыну и Святому Духу. Молим Тя, Безначальне Отче и Сыне и Душе Святый, злобою душезлобнаго мира озлобленную и к Тебе Зижидителю прешедшую душу во адово дно не отрини, Боже, Спасе мой.
И ныне и присно и во веки веков. Аминь. С Небесе Христос Бог наш, яко дождь на руно, Пречистая, сниде на Тя, напаяя весь мир и изсушая вся безбожныя потоки, наводняяй всю землю разумом Своим, Приснодево, Того моли дати покой преставленному рабу Твоему.

Кондак, глас 8:

Со святыми упокой, Христе, душу раба Твоего, идеже несть болезнь, ни печаль, ни воздыхание, но жизнь безконечная.

Икос:

Сам Един еси Безсмертный, сотворивый и создавый человека: земнии убо от земли создахомся и в землю туюжде пойдем, якоже повелел еси, Создавый мя, и рекий ми: яко земля еси и в землю отъидеши, аможе вси человецы пойдем, надгробное рыдание творяще песнь: Аллилуиа, Аллилуиа, Аллилуиа.

Песнь 7

От Иудеи дожедше отроцы, в Вавилоне иногда, верою Троическою пламень пещный попраша, поюще: отцев Боже, Благословен еси.
Владыко Христе Боже, егда хощеши судити миру, пощади душу раба Твоего, егоже от нас приял еси, вопиющаго: отец наших Боже, Благословен еси.
В пищи райстей, идеже праведных души веселятся послуживших Тебе, причти с ними, Христе, душу раба Твоего, воспевшаго: отец наших Боже, Благословен еси.
Слава Отцу и Сыну и Святому Духу. Иудейския три отроки спасый во огни, в триех лицех воспетый, избави огня вечнаго усопшаго, воспевшаго Ти верно: отец наших Боже, Благословен еси.
И ныне и присно и во веки веков. Аминь. Исаиа Тя Жезл нарече, Чистая, Даниил же Гору Несекомую, Иезекииль же Дверь, из Неяже пройде Христос, мы же Тя, Истинную Богородицу именующе величаем.

Песнь 8

Седмерицею пещь, халдейский мучитель, богочестивым неистовно разжже, силою же лучшею спасены сия видев, Творцу и Избавителю вопияше: отроцы благословите, священницы, воспойте, людие, превозносите во вся веки.
Скончав течение и к Тебе прибегох, Господи, преставленный вопиет ныне: прегрешения остави, Христе Боже, и не осуди мене, егда хощеши судити всем, верно бо Тебе взывах; вся дела Господня, Господа пойте и превозносите Его во веки.
Понесшаго, Владыко, иго Твое на раме Своем, и бремя Твое легкое, аще и не всегда, обаче в месте преподобных Твоих всели душу его, воспевшаго Тебе, Христе Спасе: отроцы, благословите, священницы, воспойте, людие, превозносите Его во веки.
Благословим Отца и Сына и Святаго Духа, Господа.
Безначальная Троице Святая, Боже Отче и Сыне и Душе Святый, в лице святых причти душу преставленнаго раба Твоего и огня вечнаго избави, да Тя хвалит, воспевая во веки: отроцы, благословите, священницы, воспойте, людие, превозносите Его во веки.
И ныне и присно и во веки веков. Аминь. Тя, Дево, пророчестии лицы прорекоша, прозряще бо Тя прозорливыма очима: ов убо Жезл нарече Тя, ин же Дверь Восточную, ов же Гору Человеки Несекомую. Мы же исповедуем Тя воистинну Богородицу, Бога всяческих рождшую, Егоже моли упокоити преставленнаго во веки вся.

Песнь 9

Ужасеся о сем небо; и земли удивишася концы, яко Бог явися человеком плотски, и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.
Иисусе Боже мой, Спасе, Адамле Ты взял еси преступление и смерти вкусил еси, да человеки от нея свободиши, Милосерде. Темже молим Тя, Милостиве: преставленнаго покой, яко Благ, во дворех святых Твоих, яко Един Всеблагий и Милосердый.
Несть никтоже, Милосерде, иже не согреши в человецех, токмо Ты Един, Иисусе Христе, вземляй грехи всего мира. Темже, очистив раба Твоего от прегрешений, вчини во святых Твоих дворех: Ты бо Живот еси и Покой, и Свет, и Веселие всех Тебе благоугодивших.
Слава Отцу и Сыну и Святому Духу. Удивися все естество человеческое како Безначального Отца Сын Сый Единородный, плоть от Девы действом Святаго Духа приял еси, и пострадал еси яко человек, да умершыя оживиши. Тем и преставленнаго ныне от нас, прилежно молим Тя, во стране живых, яко Благ, всели.
И ныне и присно и во веки веков. Аминь. Невесту Тя нарицаем, Пречистая, Отца невидимаго и Матерь Сына из Тебе Духом Святым воплощеннаго, и молебницу Тя о усопшем рабе Твоем, предлагаем: Тебе бо Помощницу имамы земнии, и любовию поюще Тя величаем.

Достойно есть яко воистинну блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

Святый Боже, Святый Крепкий, Святый Безсмертный, помилуй нас. (трижды)
Слава Отцу и Сыну и Святому Духу, и ныне и присно и во веки веков. Аминь.

Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь.

Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, яко же и мы оставляем должником нашим; и не введи нас во искушение, но избави нас от лукавого.

Тропарь, глас 6:

Един естеством Сый Животворец, Христе, и благости воистинну неизследимая пучина, ныне преставльшагося раба Твоего Царствия Твоего сподоби: Ты бо Един еси имеяй множество щедрот и безсмертие.

Слава Отцу и Сыну и Святому Духу. И ныне и присно и во веки веков. Аминь.

Богородичен:

Источник живота рождшая, Владычице, Избавителя миру Иисуса Господа, Того прилежно моли безконечнаго живота преставльшагося ныне раба Твоего сподобити: Ты бо христиан Едина еси известнейшая Помощница.

Таже: Господи, помилуй (12 раз).

И молитву сию:

Помяни, Господи Боже наш, в вере и надежди живота вечнаго преставльшагося раба Твоего, брата нашего (имярек), и яко Благ и Человеколюбец, отпущаяй грехи, и потребляяй неправды, ослаби, остави, и прости вся вольная его согрешения и невольная, избави его вечныя муки и огня геенскаго, и даруй ему причастие и наслаждение вечных Твоих благих, уготованных любящым Тя: аще бо и согреши, но не отступи от Тебе, и несумненно во Отца и Сына и Святаго Духа, Бога Тя в Троице славимаго, верова, и Единицу в Троице и Троицу во Единстве, православно даже до последняго своего издыхания исповеда. Темже милостив тому буди, и веру, яже в Тя вместо дел вмени, и со святыми Твоими яко Щедр, упокой: несть бо человека, иже поживет и не согрешит. Но Ты Един еси кроме всякаго греха, и правда Твоя, правда во веки, и Ты еси Един Бог милостей и щедрот, и человеколюбия, и Тебе славу возсылаем Отцу и Сыну и Святому Духу, ныне и присно, и во веки веков.

Клирицы: Аминь.
Иерей: Премудрость.
Клирицы: Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Иерей: Слава Тебе, Христе Боже, Упование наше, слава Тебе.
Клирицы: Слава Отцу и Сыну и Святому Духу. И ныне и присно и во веки веков. Аминь. Господи, помилуй (трижды). Благослови.

Иерей творит отпуст сей:

Воскресый из мертвых Христос Истинный Бог наш молитвами Пречистыя Своея Матере, святых славных и всехвальных апостол, преподобных и богоносных отец наших и всех святых, душу от нас преставльшагося раба Своего в селениих праведных учинит, и в недрах Авраама упокоит, и с праведными причтет, и нас помилует, яко Благ и Человеколюбец.
Клирицы: Аминь.

Иерей же глаголет:

Во блаженном успении, покой подаждь, Господи, усопшему рабу Твоему (имярек), и сотвори ему вечную память.

Отпевшие же трижды: Вечная память, отходят восвояси.